jalti hava.en kah ga.iin azm-e-sabat chhoḌ de
tera badan pighal gaya dast-e-hayat chhoḌ de
aag se khel khel kar kitne jala liye hain haath
tujh se kaha tha barha dekh ye baat chhoḌ de
main tere saath huun magar ye vo maqam hai ki ab
jo tere ji men aa.e kar ja meri baat chhoḌ de
teri nazar sarab par mujh ko aziiz gard-e-rah
tu mera ham-safar nahin to mera haath chhoḌ de
tishna labon ko chuum kar koi to ho jo ye kahe
lashkar-e-maslihat-shanas haT ja furat chhoḌ de
marka-e-bala ki shab kis ne kaha ba-sad-ḳhulus
vo bhi mujhe aziiz hai jo mera saath chhoḌ de
Leave a Reply