Bharat Bhushan Pant
sab ne honTon se laga kar toḌ Daala hai mujhe
kuza-gar ne jaane kis miTTi se Dhala hai mujhe
is tarah to aur manzar ki udasi baḌh ga.i
main kahin ḳhud men nihan tha kyuun nikala hai mujhe
shaḳh par rah kar kahan mumkin tha mera ye safar
ab hava ne apne hathon men sambhala hai mujhe
kyuun sajana chahte ho apni palkon par mujhe
ra.egan sa ḳhvab huun ankhon ne Taala hai mujhe
ik zara si dhuup ko le kar ye hangama hua
meri hi parchha.iyon ne raund Daala hai mujhe
jaane kitne chand taare raat ke jangal men the
yaad lekin ek jugnu ka ujala hai mujhe
ik dhaḌakte dil se main ne ḳhud ko patthar kar liya
ab buton ke saath hi bas rakhne vaala hai mujhe
zindagi ne apna koi ḳhvab bunne ke liye
ek ik dhage ki surat khol Daala hai mujhe
Leave a Reply