paate hain kuchh kami si tasvir-e-zindagi men
kya naqsh chhoḌ aa.e ham dasht-e-be-ḳhudi men
zinjir-e-agahi se shamshir-e-agahi tak
kya kya maqam aa.e dil ki sipah-gari men
ji dekhne ko tarse dekhun to kis nazar se
tufan-e-ḳhirgi hai jalvon ki raushni men
hasti baja.e ḳhud hai ik kar-gah-e-hasti
ham mast-bandagi men vo banda-parvari men
DhunDe se bhi na paa.i sadiyon ki justuju ne
shamil thi jo tajalli tartib-e-unsuri men
vo shai kahan hai pinhan ai mauj-e-ab-e-haivan
jo vaj.h-e-sar-ḳhushi thi barson ki tishnagi men
Leave a Reply