afzal-gauhar-rao

Isi Liye Bhi Nae Safar Se Bandhe Hue Hain

isi liye bhi nae safar se bandhe hue hain

ki ham parinde to bal-o-par se bandhe hue hain

tumhen hi sahra sambhalne ki padi hui hai

nikal ke ghar se bhi ham to ghar se bandhe hue hain

kisi ne din men tamam chhanv utaar li hai

ye barg o gul to yunhi shajar se bandhe hue hain

yahan bhala kaun apni marzi se ji raha hai

sabhi ishare tiri nazar se bandhe hue hain

sagan-e-kucha-e-dilbaran ki misal ham to

riha bhi ho kar kisi ke dar se bandhe hue hain

zamin khud ham ko khinchti phir rahi hai ‘gauhar’

ajiib aalam men rahguzar se bandhe hue hain

More Poems

Leave a Comment