bahadur-shah-zafar

Hai Dil Ko Jo Yaad Aai Falak-E-Pir Kisi Ki

hai dil ko jo yaad aai falak-e-pir kisi ki

ankhon ke tale phirti hai tasvir kisi ki

girya bhi hai naala bhi hai aur ah-o-fughan bhi

par dil men hui us ke na tasir kisi ki

haath aae hai kya khaak tire khak-e-kaf-e-pa

jab tak ki na qismat men ho iksir kisi ki

yaaro vo hai bigda hua baten na banao

kuchh pesh nahin jaane ki taqrir kisi ki

nazan na ho munim ki jahan tera mahal hai

hovegi yahan pahle bhi taamir kisi ki

meri girah-e-dil na khuli hai na khulegi

jab tak na khule zulf-e-girah-gir kisi ki

aata bhi agar hai to vo phir jaae hai ulta

jis vaqt ulat jaae hai taqdir kisi ki

is abru o mizhgan se ‘zafar’ tez ziyada

khanjar na kisi ka hai na shamshir kisi ki

jo dil se udhar jaae nazar dil ho giraftar

mujrim ho koi aur ho taqsir kisi ki

More Poems

Leave a Comment