vaqt-e-safar qarib hai bistar sameT luun
bikhra hua hayat ka daftar sameT luun
phir jaane ham milen na milen ik zara ruko
main dil ke aine men ye manzar sameT luun
yaron ne jo suluk kiya us ka kya gila
phenke hain doston ne jo patthar sameT luun
kal jaane kaise hon ge kahan honge ghar ke log
ankhon men ek baar bhara ghar sameT luun
tar-e-nazar bhi gham ki tamazat se ḳhushk hai
vo pyaas hai mile to samundar sameT luun
‘ajmal’ bhaḌak rahi hai zamane men jitni aag
ji chahta hai siine ke andar sameT luun
Leave a Reply