Tum Khub-Surat daeron Mein Rahti Ho

Afzal Ahmad Syed

tum khubsurat daeron men rahti ho

tumhare balon ko

ek mudavvar pin

farz-shanasi se thame hue hai

ek besh-qimat zanjir

tumhari gardan ki itaat kar rahi hai

kabhi ghalat na chalne vaali ghadi

tumhari kalai se paivast hai

ek nazuk belt

tumhari kamar se ham-aghosh hai

tumhare pair

in juton ke tasmon se ghire hain

jin se tum hamari zamin par chalti ho

main un chhupe hue daeron ka zikr nahin karunga

jo tumhen thame hue ho sakte hain

unhen itna hi khubsurat rahne do

jitne ki vo hain

main ne tum par kabhi

khayalon men kapde utarne ka khel nahin khela

tum khubsurat daeron men rahti ho

aur main mushkil lakiron men

men tumhare liye kya kar sakta huun

sivae

apne munh men us gend ko le kar tumhare paas aane ke

jise tum ne thokar lagai