ḳhushk dariya paḌa hai ḳhvahish ka
ḳhvab dekha tha ham ne barish ka
mustaqil dil jala.e rakhta hai
hai ye mausam hava ki sazish ka
us se kahne ko to bahut kuchh hai
vaqt milta nahin guzarish ka
koi us se to kuchh nahin kahta
bo raha hai jo beach ranjish ka
pa-ba-zanjir chal rahe hain jo ham
ye bhi pahlu hai ik numa.ish ka
phuul kal the to aaj patthar hain
ye bhi andaz hai sata.ish ka
main ne ankhon se guftugu kar li
ye hunar hai zaban ki bandish ka
khil rahe hain gulab zaḳhmon ke
shukriya aap ki navazish ka
jaari mashq-e-suḳhan rahe ‘ejaz’
kuchh sila to milega kavish ka
Leave a Reply