sukun-e-dil ho magar tum bacha sake na mujhe
dalil-e-dard-e-jigar tum bacha sake na mujhe
tumhi safina tumhi na-ḳhuda tumhi sahil
main Dubta huun magar tum bacha sake na mujhe
kisi ke dast-e-shifa kaise mere kaam aa.en
mire tabib agar tum bacha sake na mujhe
huun shab-gazida gham-e-dil bichhaḌ ga.e tum bhi
mire sharik-e-safar tum bacha sake na mujhe
lage hain dil pe mire charasaz tir-e-bala
tumhi the sina-sipar tum bacha sake na mujhe
koi na dekh saka hai mira ye soz-e-darun
tumhi the ahl-e-nazar tum bacha sake na mujhe
para.i aag men andar se jal raha huun main
mire chinar-shajar tum bacha sake na mujhe
Leave a Reply