pahlu ke ar-par guzarta hua sa ho
ik shaḳhs aaine men utarta hua sa ho
jiita hua sa ho kabhi marta hua sa ho
ik shahr apne aap se Darta hua sa ho
saare kabira aap hi karta hua sa ho
ilzam dusre hi pe dharta hua sa ho
har ik naya ḳhayal jo tapke hai zehn se
yuun lag raha hai jaise ki barta hua sa ho
qailula kar rahe hon kisi niim ke tale
maidan men raḳhsh-e-umr bhi charta hua sa ho
maashuq aisa DhunDiye qahtur-rijal men
har baat men agarta magarta hua sa ho
phir baad men vo qatl bhi kar de to harj kya
lekin vo pahle pyaar bhi karta hua sa ho
gar daad tu na de na sahi galiyan sahi
apna bhi koi aib hunarta hua sa ho