Hath Khaali the KHaridar Hua Tha Us Din

haath ḳhālī the ḳharīdār huā thā us din

maiñ ki rusvā sar-e-bāzār huā thā us din

haañ usī dar pe sadā phir se lagā.ī jaa.e

haañ usī dar se to inkār huā thā us din

merī ta.amīr meñ us kā bhī baḌā haath rahā

shaḳhsiyat par jo mirī vaar huā thā us din

ab to īmān se rangoñ pe na ḳhushbū pe yaqīñ

phuul chunñe kā gunahgār huā thā us din

ek chaTTān pe barsā thā ghaTā ban ke ‘nizām’

kis nadāmat se maiñ do-chār huā thā us din

Leave a Comment