Na Surat Kahin Shadmani Ki Dekhi

na surat kahin shadmani ki dekhi

bahut sair duniya-e-fani ki dekhi

miri chashm-e-khun-bar men khuub rah kar

bahar aap ne gul-fishani ki dekhi

tamanna ne us ru-e-zeba ko dekha

ki tasvir husn-e-javani ki dekhi

ajab shauq se dast-e-saqi men ham ne

surahi mai-e-arghavani ki dekhi

zahe rob-e-husn un ke dar par kisi ne

zarurat na kuchh pasbani ki dekhi

na tum sa khush-akhlaq paaya na ham ne

kahin shaan ye dil-sitani ki dekhi

mujhe kar ke mayus bole vo ‘hasrat’

masarrat gham-e-javedani ki dekhi

Leave a Comment