dukh navishta hai to andhi ko likha ahista
ai khuda ab ke chale zard hava ahista ahista
khvab jal jaaen miri chashm-e-tamanna bujh jaae
bas hatheli se ude rang-e-hina ahista
zakhm hi kholne aai hai to ujlat kaisi
chhu mire jism ko ai bad-e-saba ahista
tutne aur bikharne ka koi mausam ho
phuul ki ek dua mauj-e-hava ahista
janti huun ki bichhadna tiri majburi hai
par miri jaan mile mujh ko saza ahista
miri chahat men bhi ab soch ka rang aane laga
aur tira pyaar bhi shiddat men hua ahista
niind par jaal se padne lage avazon ke
aur phir hone lagi teri sada ahista
raat jab phuul ke rukhsar pe dhire se jhuki
chand ne jhuk ke kaha aur zara ahista
Leave a Reply