Ramz Azimabadi
kuchh is ada se safiran-e-nau-bahar chale
salib dosh pe rakh kar gunahgar chale
nikal ke ku-e-mohabbat se so.e daar chale
hamare saath na kyuun mausam-e-bahar chale
tumhari yaad sahi qurbat-e-badan na sahi
kisi tarah to mohabbat ka karobar chale
hamare dam se gham-e-zindagi ki azmat hai
hamare saath sitam-ha-e-rozgar chale
isi ka naam baharan hai kuchh kaho yaaro
chaman men hanste hue aa.e sogvar chale
hazar ham pe ḳharabi guzar ga.i lekin
lahu se apne tiri anjuman sanvar chale
ik ek saans hain sadiyon ka dard shamil hai
tumhari bazm men vo zindagi guzar chale
Leave a Reply