Quaiser Khalid
labon ko khol to kaisa bhi ho javab to de
na baanT sud-o-ziyan ko magar hisab to de
vafa, ḳhulus o mohabbat ko phir samajhna hai
kahan likhe hain ye alfaz tu kitab to de
ab is tarah bhi rivayat se inhiraf na kar
badal agarche tu achchha na de, ḳharab to de
ye kya ki apni hi raftar par hai vo nazan
kisi ke rengte qadmon ko ab-o-tab to de
chhalak raha hai zamane ke sabr ka pyala
hamare ahd ke fir.aun ko azaab to de
tapish ne vaqt ki jhulsa ke un ko rakkha hai
ḳhizan-nasibon ko thoḌa sahi shabab to de
hai iḳhtiyar men jitna tire tu utna to kar
na mil sake koi ta.abir, un ko ḳhvab to de
main teri tang-nigahi ki kya karun tavil
sulagti a.ankhon ko paani na de sarab to de
yuun nasl-e-nau ki zehanat ko mumtahin na parakh
jise paḌhe ye na.i nasl vo kitab to de
kisi ko kya hai gharaz jo paḌhe tiri rudad
kare appeal kisi ko vo ek baab to de
taḌap rahi hai zamin kab se munsifi ke liye
nabi nahin to zamane ko ‘bu-turab’ to de
Leave a Reply