Alam Khursheed
zaval men bhi raha dil-nashin nazara mira
mire hi saath gira TuuT ke sitara mira
kisi pe ramz miri baat ki khuli hi nahin
na kaam aaya mire koi isti.ara mira
yaqin kisi ko na aaya main Duub sakta huun
samajh rahe the agarche sabhi ishara mira
nadi ki tarah kinara bhi kaTta huun main
kisi hisar men hota nahin guzara mira
ye baat jaan ke hairat nahin hui mujh ko
ki meri aag se raushan raha sitara mira
na rok paa.i mujhe maujon ki koi sazish
ravan-davan hai abhi jhiil men shikara mira
abhi se samt badalne laga main kyuun ‘alam’
abhi to duur bahut duur hai kinara mira
Leave a Reply