Imran Badayuni
main shajar huun aur ik patta hai tu
meri hi to shaḳh se TuuTa hai tu
sha.eri men roz tufan se laḌa
kya samundar men kabhi utra hai tu
sub.h tak sahmi rahin ankhen miri
ḳhvab kaisi raah se guzra hai tu
kya ḳhabar kab saath mera chhoḌ de
ankhon men Thahra hua qatra hai tu
kuchh kami shayad tiri miTTi men hai
jab sameTa dil tujhe bikhra hai tu
vaqt-e-ruḳhsat tu bura mat kah ise
umr bhar is jism men Thahra hai tu
buz-dili keval mire andar hai kya
yuun mujhe hairat se kyuun takta hai tu
ye tiri sazish hai ya phir ittifaq
main jahan Duuba vahin ubhra hai tu
jo andhere men kahin gum ho gaya
sochta huun kya vahi saaya hai tu
kya ḳhabar muḳhbir hava ka ho vahi
ai diye jis ke liye jalta hai tu
zindagi ne phir tujhe uljha liya
main na kahta tha abhi bachcha hai tu
Leave a Reply