Kaleja Munh Ko Aaya Aur Nafas Karne Laga Tangi

kaleja munh ko aaya aur nafas karne laga tangi

hua kya jaan ko meri abhi to thi bhali-changi

zaqan ki chaah men ye sabzi-e-ḳhat zahr-e-qatil hai

pari hai bhang kuue men na ho kyuun ḳhalq chit-bhangi

jahan ki tarah sau sau rang pal pal men badalta hai

kabhu kuchh hai kabhu kuchh hai kabhu kuchh hai vo bahu-rangi

tire ruḳhsar se be-tarah lipTi jaa.e hai zalim

jo kuchh kahiye to bal kha uljhati hai zulf be-Dhangi

gharibon ka ḳhuda-hafiz hai ‘hatim’ dekhiye kya ho

ki vo hai chuur kaifi haath men shamshir hai nangi