dil ko be-tab rakhti hai ik aarzu
kam hai ye vusat-e-alam-e-rang-o-bu
le chali hai kidhar phir nai justuju
ta-ba hadd-e-nazar ud ke jaate hain ham
vo jo haail the rahon men shams o qamar
ham-safar un ko apna banate hain ham
hai zamin parda-e-lala-o-nastaran
asman parda-e-kahkashan hai abhi
raz-e-fitrat hua laakh ham par ayaan
raz-e-fitrat nihan ka nihan hai abhi
jis ki sadiyon udhar ham ne ki ibtida
na-tamam apni vo dastan hai abhi
manzilen ud gaiin ban ke gard-e-safar
rahguzaron hi men karvan hai abhi
pi ke nakamiyon ki sharab-e-kuhan
apna zauq-e-tajassus javan hai abhi
haath kaate gae jurat-e-shauq par
khun-chakan ho ke vo gul-fishan ho gae
hairaton ne lagai jo mohr-e-sukut
lab khamoshi men jaadu bayan ho gae
raste men jo kohsar aae to ham
aise tadpe ki sail-e-ravan ho gae
hain azal se zamin ke kure par amiir
ho ke mahdud ham be-karan ho gae
zuaq-e-parvaz bhi dil ki ik jast hai
khaak se zinat-e-asman ho gae
aql-chalak ne di hai aa kar khabar
ik shabistan hai aivan-e-mahtab men
muntazir hain nigaran-e-atish-badan
jagmagati fazaon ki mehrab men
kitne dilkash hasin khvab bedar hain
maah o mirrikh ki chashm-e-be-khvab men
khinch phir zulf-e-mashuq-e-nil-gun
le le shole ko phir dast-e-betab men
muzhda ho mah-jabinan-e-aflak ko
bazm-e-giti ka sahab nazar aa gaya
tahniyat husn ko be-naqabi ki do
dida-var aa gaya parda-dar aa gaya
asman se gira tha jo kal tuut kar
vo sitara ba-dosh-e-qamar aa gaya
le ke paimana-e-dard-e-dil haath men
mal ke chehre pe khun-e-jigar aa gaya
bazm-e-sayyargan-e-falak-sair men
ik hunar-mand sayyara-gar aa gaya
shauq ki had magar chand tak to nahin
hai abhi rifat-e-asman aur bhi
hai surayya ke pichhe surayya ravan
kahkashan se pare kahkashan aur bhi
jhankti hain fazaon ke pechak se
rang aur nuur ki vadiyan aur bhi
aur bhi manzilen, aur bhi mushkilen
hain abhi ishq ke imtihan aur bhi
aaj dast-e-junun par hai sham-e-khirad
do jahan jis ke shole se maamur hain
le ke aaen payam-e-tulu-e-sahar
jitne suraj khalaon men mastur hain
kah do barq-e-tajalli se ho jalva-gar
aaj muusa nahin ham sar-e-tur hain
Leave a Reply