main vahshat-o-junun men tamasha nahin bana
sahra mire vajud ka hissa nahin bana
is baar kuza-gar ki tavajjoh thi aur samt
varna hamari khaak se kya kya nahin bana
soi hui ana mire aade rahi sada
koshish ke bavajud bhi kaasa nahin bana
ye bhi tiri shikast nahin hai to aur kya
jaisa tu chahta tha main vaisa nahin bana
varna ham aise log kahan thahrte yahan
ham se falak ki samt ka ziina nahin bana
jitne kamal-rang the saare liye gae
phir bhi tire jamal ka naqsha nahin bana
roka gaya hai vaqt se pahle hi mera chaak
mujh ko ye lag raha hai main puura nahin bana
Leave a Reply