Ashfaq Nasir
ranj jo dida-e-namnak men dekha gaya hai
ye faqat sina-e-sad-chak men dekha gaya hai
is se aage hai miyan muntziron ki basti
ik diya jalta hua taaq men dekha gaya hai
ai junun us ki kahani bhi suna.unga tujhe
ye jo paivand mire chaak men dekha gaya hai
ya.ani ik aankh abhi DhunDhti phirti hai mujhe
ya.ani ik tiir miri taak men dekha gaya hai
ek ḳhvahish ka mire dil men utarna ‘ashfaq’
ik sharara ḳhas-o-ḳhashak men dekha gaya hai
hijr aur dasht men jo shaḳhs bhi Thahra ‘ashfaq’
tajraba uḌti hui ḳhaak men dekha gaya hai
Leave a Reply