aisa mahsus kar raha huun main
jaise is shahr men naya huun main
apni ḳhushbu se ḳhauf aata hai
kin havaon men ghir gaya huun main
teri kuchh aur baat hai varna
saath apne bhi kam raha huun main
ḳhal-o-ḳhad pe na apne ghaur karo
mujh se ruTho ki aa.ina huun main
uf ye kaif-e-fasana-ha-e-junun
likh raha huun miTa raha huun main
koi mausam ho ab mujhe kya fikr
barg huun shaḳh se juda huun main
huun ‘munavvar’ bura to main lekin
kaun jaane ki kyuun bura huun main
Leave a Reply