is samundar men sanbhal kar hi utarna varna
ishq par sab hi kahenge tujhe varna varna
dekhne ki to ijazat hai magar dhyan rahe
us ki ankhon men kisi ne na sanvarna varna
quvvat-e-siql hai jo apni taraf khinchti hai
kab bulandi se utarta bhala jharna varna
sirf kajal ki lakiren hi bhali lagti hain
us ki ankhon men koi rang na bharna varna
hai ijazat ki sabhi zaḳhm bharo marham se
haan magar dhyan ki ik zaḳhm na bharna varna
hijr men zabt karo jitna ho mumkin ya phir
TuTna aise ki har samt bikharna varna
ishq ik aag ka dariya to hai sach hai lekin
koi diqqat ho to phir pul se guzarna varna
Leave a Reply