agar ḳhu-e-tahammul ho to koi gham nahin hota
gile shikve se rang-e-zindagi kuchh kam nahin hota
bujhi jaati hain sham.en rahguzar-e-zindagani ki
charagh-e-arzu lekin kabhi maddham nahin hota
ḳhuda ke samne jo sar yaqin ke saath jhuk jaa.e
kisi taqat ke aage phir kabhi vo ḳham nahin hota
ata ki hai ḳhuda ne ilm ki daulat agar tujh ko
saḳhavat kar saḳhavat ye ḳhazana kam nahin hota
siyasat juzv-e-iman hai chalo yunhi sahi lekin
koi murshid mizaj-e-vaqt ka mahram nahin hota
uruj-e-paikar-e-ḳhaki se hai insaniyat larzan
fasad o sarkashi se paak ye aalam nahin hota
suno azadi-e-insan ka dhonsa piTne vaalo
har ik insan vaj.h-e-azmat-e-adam nahin hota
ba-qadr-e-zarf-o-himmat hai rasa.i fikr-e-insan ki
har ik aami rumuz-e-mulk ka mahram nahin hota
Leave a Reply