Ye Daur Kaisa Hai Ya-Ilahi Ki Dost Dushman Se Kam Nahin Hai

Poet

ye daur kaisa hai ya-ilahi ki dost dushman se kam nahin hai

ḳhulus-e-har-rahbar-e-zamana fareb-e-rahzan se kam nahin hai

hua to hai be-naqab koi nazar hai mahrum-e-did phir bhi

naqab se hai siva tajalli jamal-e-chilman se kam nahin hai

laga ke ḳhun-e-jigar ka Tiika hai samne gham ke sar-ba-sajda

sanam-parasti men tu bhi ai dil kisi barahman se kam nahin hai

qafas ki hai ab mira Thikana zarur hoga tabah ik din

ki bijliyon ki nazar men ye bhi mire nasheman se kam nahin hai

misal-e-ḳhurshid jalva-gar hai jigar ka har ek dagh-e-taban

nazara kar meri sham-e-gham ka jo sub.h-e-raushan se kam nahin hai

ye ḳhushk be-rang ḳhaar fazil mire liye hain gulon se behtar

miri nazar men mira bayaban kisi ke gulshan se kam nahin hai