Sameena Raja
shajar-e-ishq hamen daar ke manand bhi hai
dil kisi shaḳh-e-tarab-nak se paivand bhi hai
dil-e-nadan se nahin ahl-e-jahan se puchho
koi misaq-e-mohabbat pe raza-mand bhi hai
darguzar bam-e-vafa se ki junun-ḳhez hava
ye charagh ek shab-e-va.ada ka paband bhi hai
raat tanha.i ta.aqub men musalsal koi chaap
aur jab ilm ho aage ye gali band bhi hai
chhoḌ bhi aa.e vo ghar bhuul bhi aa.e hain vo yaad
dil men kuchh TuuTe hue tiir ke manand bhi hai
dastak-e-hijr se TuuTi thi miri niind so ab
raat bhi baaqi hai aur ḳhvab ka dar band bhi hai
Leave a Reply