ye umr musibat ki basar ho ke rahegi
jab shaam hui hai to sahar ho ke rahegi
afsurdagi-e-dil gul-e-tar ho ke rahegi
ah-e-sahari bad-e-sahar ho ke rahegi
ḳhud un ke taghaful ki inayat se kisi din
un ko miri halat ki ḳhabar ho ke rahegi
vo barq-e-tajalli jo abhi ka.aba-e-dil hai
ik roz vo masjud-e-nazar ho ke rahegi
ya qabil-e-sajda hi rahega na dar-e-husn
ya meri jabin qabil-e-dar ho ke rahegi
sairab nazar hogi miri ya gul-e-tar se
ya ḳhatm bahar-e-gul-e-tar ho ke rahegi
ab un ki jafa.en nazar-andaz na hongi
ab meri vafa madd-e-nazar ho ke rahegi
jo ghaflat-e-azadi-e-gulshan men kaTegi
us raat ki zindan men sahar ho ke rahegi
Leave a Reply