Mahir Abdul Hayee
ajiib daur hai ahl-e-hunar nahin aate
pidar ka ilm liye ab pisar nahin aate
hava ke jhonke bhi le kar ḳhabar nahin aate
jo ghar se jaate hain phir lauT kar nahin aate
hazar shaḳh-e-tamanna ki dekh-bhal karo
ye shaḳh vo hai ki jis par samar nahin aate
samajh sakenge na meri guzar-basar ko huzur
sunahre taḳht se jab tak utar nahin aate
ham un ki samt chalen kis tarah se milon-mil
hamari samt jo balisht-bhar nahin aate
janab-e-shaiḳh ke hujre se duur hi rahiye
farishte aate hain is men bashar nahin aate
saval hi na tha dushman ki fath-yabi ka
hamari saf men munafiq agar nahin aate
na jaane kis ki nazar lag ga.i zamane ko
ki phuul chehre shagufta nazar nahin aate
vo din ga.e ki koi ḳhvab ham ko taḌpa.e
ab aise ḳhvab hamen rat-bhar nahin aate
ham un ki raah men ankhen bichha.en kyuun ‘mahir’
jo asman se sar-e-rah-guzar nahin aate
Leave a Reply