Hayat Di to Use Gham Ka Silsila Bhi Kiya

Rashid Aazar

hayat di to use gham ka silsila bhi kiya

qaza ke saath qadar ko miri saza bhi kiya

usi ne dar-ba-dari ko na.i talash bhi di

bura to us ne kya hi magar bhala bhi kiya

baghair mange hi dena hai shan-e-maula.i

mira vaqar bhi rakkha mujhe ata bhi kiya

tazad us ki mohabbat ka main hi janta huun

jalaya dhuup men anchal ka aasra bhi kiya

ajiib tarah ki hai shan-e-dilbari ‘azar’

ki mujh se ḳhush bhi raha aur mujhe ḳhafa bhi kiya