har-vaqt ulajhta hai ye dil zulf-e-dota men
samjhata huun kam-baḳht na paḌ ja ke bala men
dekho na kabhi ḳhu-e-sitam apni badalna
milta hai maza ham ko bahut jaur-o-jafa men
kis lutf se ayyam guzarte hain hamare
din nala-o-fariyad men shab ah-o-baka men
miTTi hui barbad tire ishq men aisi
kuchh ḳhaak ke zarre nazar aate hain hava men
kyuun chal diye mai-ḳhane se ai shaiḳh Thaharna
poshida nazar aata hai kuchh aaj aba men
kahti hai ye tauba ki gunahgar main behtar
ai dil kabhi bhule se bhi paḌna na riya men
kar duun shab-e-furqat ka bayan hashr men lekin
Darta huun tavalat na paḌe roz-e-jaza men
marna jise kahte hain vo hai ziist ka aghaz
milti hai baqa sab ko isi rah-e-fana men
kis ke liye allah ne jannat ko banaya
bande to yahan rahte hain har vaqt ḳhata men
maqbul hui hashr men gar meri ḳhajalat
mil ja.egi jannat bhi gunahon ki saza men
vaa.iz kahe kuchh bhi hamen ma.alum hai yarab
sau ḳhuld hain poshida tiri ek raza men
hil jaati hai duniya miri fariyad se ‘hafiz’
tasir ghazab ki hai miri ah-e-rasa men
Leave a Reply