ḳhuda bacha.e mohabbat ki us bala se bhi
ki dard-e-dil nahin jaata kisi dava se bhi
jala rakhe hain miri zindagi men sanson ne
charagh aise ki bujhte nahin hava se bhi
mire liye mira allah kaun sa kam hai
mujhe to kaam nahin hai kisi ḳhuda se bhi
charagh-e-rah banaya hai tum ne kis kis ko
kabhi mile ho mohammad ke naqsh-e-pa se bhi
ham apni jaan usi par nisar karte hain
hamen vo qatl kare chahe jis ada se bhi
isi chaman men jo mera chaman hai mera chaman
bahut se peḌ mire ḳhuun ke hain pyase bhi
sitam kisi pe vo karte nahin hamare siva
jafa to hai ye magar kam nahin vafa se bhi
dhaḌakte sher sune ham ne bint-e-‘kaif’ se aaj
mile ham ek mohabbat ki sha.era se bhi
Leave a Reply