ismail-merathi

Hai Be-Lab-O-Zaban Bhi Ghul Tere Nam Ka

hai be-lab-o-zaban bhi ghul tere naam ka

mahram nahin hai gosh magar is payam ka

khush hai malamat ahl-e-kharabat kai liye

is silsile men naam nahin nang-o-nam ka

nakhvat hai jis ke kasa-e-sar men bhari hui

kab mustahiq hai mahfil rindan men jaam ka

jagir-e-dard par hamen sarkar-e-ishq ne

tahrir kar diya hai vasiqa davam ka

vadi-e-ishq men na mila koi ham-safar

sunte the naam khizr alaihis-salam ka

asudgi na DhunD ki jaata hai karvan

le mustaar barq se vaqfa qayam ka

khola hai mujh pe sirr-e-haqiqat majaz ne

ye pukhtagi sila hai khayalat-e-kham ka

khata nahin fareb-e-tamanna-e-do-jahan

khugar nahin hai tausan-e-himmat lagam ka

mat rakh tamaa se chashm-e-tamatto ki hai yahan

daana har ek mardumak-e-dida-dam ka

pahuncha diya hudud-e-do-alam se bhi pare

mutrib ne raag chhed diya kis maqam ka

zulmat men kya tamiz safed-o-siyah ki

furqat men kuchh hisab nahin subh-o-sham ka

jis ki nazar hai sanat-e-abru-nigar par

hai vo qatil-e-tegh na kushta niyam ka

khane ko ai haris gham-e-ishq kam nahin

ye ho to kuchh bhi fikr na kar qarz-o-vam ka

main be-qarar-e-manzil-e-maqsud be-nishan

raste ki intiha na thikana maqam ka

gar dekhiye to khatir-e-nashad shaad hai

sach puchhiye to hai dil-e-nakam kaam ka

utthe tiri naqab to uth jaae ek baar

sab tafraqa ye roz-o-shab-o-subh-o-sham ka

More Poems

Leave a Comment