jag men koi na tuk hansa hoga
ki na hanste men ro diya hoga
un ne qasdan bhi mere naale ko
na suna hoga gar suna hoga
dekhiye ab ke gham se ji mera
na bachega bachega kya hoga
dil zamane ke haath se salim
koi hoga jo rah gaya hoga
haal mujh gham-zada ka jis tis ne
jab suna hoga ro diya hoga
dil ke phir zakhm taaza hote hain
kahin ghuncha koi khila hoga
yak-ba-yak naam le utha mera
ji men kya us ke aa gaya hoga
mere nalon pe koi duniya men
bin kiye aah kam raha hoga
lekin us ko asar khuda jaane
na hua hoga ya hua hoga
qatl se mere vo jo baaz raha
kisi bad-khvah ne kaha hoga
dil bhi ai ‘dard’ qatra-e-khun tha
ansuon men kahin gira hoga
Leave a Reply