Akhgar Mushtaq Raheem Aabadi
hangama-e-afat idhar bhi hai udhar bhi
barbadi-e-halat idhar bhi hai udhar bhi
honTon pe tabassum kabhi palkon pe sitare
ye dil ki karamat idhar bhi hai udhar bhi
bechain agar main huun to vo bhi hain pareshan
dar-parda koi baat idhar bhi hai udhar bhi
ashuftagi-e-qalb-o-nazar chhup na sakegi
ik mahshar-e-jazbat idhar bhi hai udhar bhi
har chand takalluf hai mulaqat men lekin
arman-e-mulaqat idhar bhi hai udhar bhi
mujrim kise gardaniye kahiye kise ma.asum
ik sail-e-shikayat idhar bhi hai udhar bhi
kyunkar kabhi niklegi koi sulh ki surat
ik talḳhi-e-jazbat idhar bhi hai udhar bhi
un ko bhi koi ranj hai mujh ko bhi koi gham
ik fikr si din raat idhar bhi hai udhar bhi
afsos bhari bazm men bhi mil nahin sakte
kuchh pas-e-rivayat idhar bhi hai udhar bhi
jo tark-e-ta.alluq pe bhi jaati nahin dil se
vo dil ki lagi baat idhar bhi hai udhar bhi
naale bhi sharar-bar hain naghme bhi sharar-bar
ik atish-e-jazbat idhar bhi hai udhar bhi
‘aḳhgar’ hi ka daman nahin namnak shab-e-gham
ankhon ki ye barsat idhar bhi hai udhar bhi
Leave a Reply