hazar ham-safaron men safar akela hai
ye intishar ki ik ik bashar akela hai
gulu-burida sabhi hain magar zah-e-tauqir
buland nok-e-sinan par ye sar akela hai
na pattiyan hain na phal-phul phir bhi chhanv to dekh
suna tha main ne ki gham ka shajar akela hai
ye bhiiḌ ḳhaak dikha.egi shan-e-be-jigari
ye us ka haq hai jo sina-sipar akela hai
lipaT ke ruuh se kahta raha badan kal raat
na jaao chhoḌ ke mujh ko ki ghar akela hai
mata-e-qalb-o-jigar kis ko saunp duun ‘saghar’
hujum-e-be-hunari men hunar akela hai
Leave a Reply