Hum Hi Tanha Na Teri Chashm Ke Bimar Hue

ham hi tanha na tiri chashm ke bimar hue

is maraz men to kai ham se giraftar hue

sina-e-khasta hamare se hai ghirbal ko rashk

navak-e-gham jigar-o-dil se zi-bas paar hue

bikne moti lage bazar men kaudi kaudi

yaad men teri zi-bas chashm-e-guhar-bar hue

roz-e-avval ki tum aa misr-e-mohabbat ke biich

yusuf-e-asr hue raunaq-e-bazar hue

naqd-e-jan-o-dil-o-din de ke liya ham ne tumhen

saikdon ahl-e-havas garche kharidar hue

ghar men le aae tumhen chaah se karne shadi

ki tum is gham-kade men sham-e-shab-tar hue

rukh-e-taban se tumhare ki hai khurshid-misal

dar-o-divar sabhi matla-e-anvar hue

DhunDhte tum ko pade phirte the ham shahr-ba-shahr

khvar-o-rusva-e-sar-e-kucha-o-bazar hue

lillahil-hamd ki muddat men tum ai nur-e-nigah

bais-e-raushni-e-dida-e-khun-bar hue

khana-e-chashm men rakhte the shab-o-roz ki tum

qurrat-ul-ain hue rahat-e-didar hue

dekh kar mehr-o-vafa o karam-o-lutf ko ham

jante yuun the ki tum yar-e-vafadar hue

jis men tum hote khushi so hi to ham karte the

par nahin jante kis vaste bezar hue

ab hamen chhod ke yuun zar-o-nizar-o-ghamgin

tum kahin aur hi ja yaan se numudar hue

ye to hargiz hi na thi tum se tavaqqo ham ko

ki sitamgar dil-azar jafa-kar hue

na vo ikhlas-o-mohabbat hai na vo mehr-o-vafa

sheva-e-jaur-o-jafa-o-sitam izhar hue

ya vo altaf-o-karam tha ki sada rahte the

ai gul-andam hamare gae ke haar hue

is men hairan hain ki kya aisi hui hai taqsir

qatl karne ke taiin phirte ho tayar hue

tegh-e-khun-rez-ba-kaf khanjar-e-burran ba-miyan

har ghadi samne aa jaate ho khunkhar hue

phir to kya hai sunte ho utho bismillah

khinch kar tegh ko aao jo sitamgar hue

varna dil khol ke lag jaao gale se pyare

go ki ham qatl hi karne ke saza-var hue

utni hi baat ke kahne men ki ik bosa do

aah ai shokh jo aise hi gunahgar hue

tauba karte hain qasam khate hain sunte ho tum

phir nahin kahne ke aage ko khabar-dar hue

puchhta kya hai tu ‘bedar’ hamara ahval

dam-e-khuban men phir ab aae giraftar hue

Leave a Comment