ji uthe hashr men phir ji se guzarne vaale
yaan bhi paida hue phir aap pe marne vaale
chuus kar kis ne chhudai hai missi honthon ki
samne munh to karen baat na karne vaale
shab-e-matam ki udasi hai suhani kitni
chhanv men taron ki nikle hain sanvarne vaale
ham to samjhe the ki dushman pe uthaya khanjar
tum ne jaana ki hamin tum pe hain marne vaale
pi ke aae hain kahin haath na bahke vaaiz
dadhi katren na kahin jeb katarne vaale
sin hi kya hai abhi bachpan hi javani men sharik
so rahen paas mire khvab men Darne vaale
haath gustakh hain uth jaaen na ye daman par
bach ke niklen mire marqad se guzarne vaale
nazaa men hashr ke vaade ne ye taskin bakhshi
chain se so rahe munh Dhanp ke marne vaale
apne daman ko sambhale hue bhole-pan se
vo chale aate hain dil le ke mukarne vaale
sabr ki mere mujhe daad zara de dena
o mire hashr ke din faisla karne vaale
aati hai hur-e-jinan khalvat-e-vaiz ke liye
qabr men utrenge mimbar se utarne vaale
tere ashiq jo gae hashr men ye shor utha
jaaen dozakh men dam sard ke bharne vaale
zer-e-pa dil hi bichhe hon ki hain khugar us ke
farsh-e-gul par bhi nahin paaon vo dharne vaale
ashk-e-gham aise nahin hain jo umanD kar rah jaaen
hain ye tufan mire sar se guzarne vaale
kya maza deti hai bijli ki chamak mujh ko ‘riyaz’
mujh se lapte hain mire naam se Darne vaale