kis sitamgar ka gunahgar huun allah allah
kis ke tiron se dil-afgar huun allah allah
us ke hathon se na jiita huun na marta huun main
kis musibat men giraftar huun allah allah
ḳhizr ab duur kar aage se mire ab-e-hayat
kis ke bose ka talabgar huun allah allah
kyuun na ankhon men rakhe mujh ko zuleḳha bhi aziiz
kaise yusuf ka ḳharidar huun allah allah
namak-e-husn se us lab ke maze luTun huun
kis namak-dan ka namak-ḳhvar huun allah allah
nargis ab ham se na kar dava-e-ham-chashmi tu
kis ki nargis ka main bimar huun allah allah
itna kahta bhi nahin kaun ye chillata hai
kab se nalan pas-e-divar huun allah allah
ḳhvab men yaar ne aa mujh ko jagaya ‘hatim’
kis qadar tal.e-e-bedar huun allah allah
Leave a Reply