Kis Sitamgar Ka Gunahgar Hun Allah Allah

kis sitamgar kā gunāhgār huuñ allāh allāh

kis ke tīroñ se dil-afgār huuñ allāh allāh

us ke hāthoñ se na jiitā huuñ na martā huuñ maiñ

kis musībat meñ giraftār huuñ allāh allāh

ḳhizr ab duur kar aage se mire āb-e-hayāt

kis ke bose kā talabgār huuñ allāh allāh

kyuuñ na āñkhoñ meñ rakhe mujh ko zuleḳhā bhī aziiz

kaise yūsuf kā ḳharīdār huuñ allāh allāh

namak-e-husn se us lab ke maze lūTūñ huuñ

kis namak-dāñ kā namak-ḳhvār huuñ allāh allāh

nargis ab ham se na kar dāva-e-ham-chashmī tū

kis kī nargis kā maiñ bīmār huuñ allāh allāh

itnā kahtā bhī nahīñ kaun ye chillātā hai

kab se nālāñ pas-e-dīvār huuñ allāh allāh

ḳhvāb meñ yaar ne aa mujh ko jagāyā ‘hātim’

kis qadar tāl.e-e-bedār huuñ allāh allāh

Leave a Comment