Shafiq Saleemi
jo bhi ham se ban paḌa karte rahe
rut badalne ki dua karte rahe
kaisi kaisi chahaton ke the charagh
jin ko ham burd-e-hava karte rahe
Taank kar ḳhush-rang ummidon ke phuul
ḳhushk Tahni ko hara karte rahe
rang ḳhushbu se alag hote na the
lafz ma.ani se juda karte rahe
jante the chaplusi ka hunar
kaam phir bhi dusra karte rahe
ḳhauf-nagri ke makin the ham ‘shafiq’
phir bhi jazbon ko sada karte rahe
Leave a Reply