Tahzeeb Hafi
vaise main ne duniya men kya dekha hai
tum kahte ho to phir achchha dekha hai
main us ko apni vahshat tohfe men duun
haath uTha.e jis ne sahra dekha hai
bin dekhe us ki tasvir bana lunga
aaj to main ne us ko itna dekha hai
ek nazar men manzar kab khulte hain dost
tu ne dekha bhi hai to kya dekha hai
ishq men banda mar bhi sakta hai main ne
dil ki dastavez men likha dekha hai
main to ankhen dekh ke hi batla dunga
tum men se kis kis ne dariya dekha hai
aage sidhe haath pe ek tara.i hai
main ne pahle bhi ye rasta dekha hai
tum ko to is baagh ka naam pata hoga
tum ne to is shahar ka naqsha dekha hai
Leave a Reply