mujhe ye justuju kyuun ho ki kya huun aur kiya tha main
koi apne siva huun main koi apne siva tha main
na jaane kaun sa atish-fishan tha mere siine men
ki ḳhali tha bahut phir bhi dhamak kar phaT paḌa tha main
to kya main ne nashe men vaqa.i ye guftugu ki thi
mujhe ḳhud bhi nahin ma.alum tha jo sochta tha main
ḳhud apne ḳhol men ghuT kar na rah jaata to kya karta
yahan ik bhiiḌ thi jis bhiiḌ men gum ho gaya tha main
na luTna meri qismat hi men tha likkha hua varna
andheri raat thi aur biich raste men khaḌa tha main
guzarne ko to mujh par bhi ajab ik hadisa guzra
magar us vaqt jab sadmon ka aadi ho chuka tha main
main kahta tha suno sachcha.i to ḳhud hai sila apna
ye nukta iktisabi tha magar sach bolta tha main
tujhe to dusron se bhi ulajhne men takalluf tha
mujhe to dekh apne-ap se uljha hua tha main
ḳhulus o iltifat o mehr jo hai ab usi se hai
jise pahle na jaane kis nazar se dekhta tha main
jo ab yuun mere girda-gird hain kuchh roz pahle tak
unhi logon ke haq men kis qadar sabr-azma tha main
bahut ḳhush-ḳhulq tha main bhi magar ye baat jab ki hai
na auron hi se vaqif tha na ḳhud ko janta tha main
Leave a Reply