Midhat Ul Akhtar
jaane vaale mujhe kuchh apni nishani de ja
ruuh pyasi na rahe aankh men paani de ja
vaqt ke saath ḳhad-o-ḳhal badal jaate hain
jo na badle vahi tasvir purani de ja
tire mathe pe mira naam chamakta tha kabhi
un dinon ki koi pahchan purani de ja
jis ki aghosh men kaT jaa.en hazaron raten
meri tanha.i ko chhu kar vo kahani de ja
rakh na mahrum ḳhud apni hi rifaqat se mujhe
aa.ina mujh ko dikha de mira saani de ja
Leave a Reply