Marhale Zist Ke Dushwar Abhi Ho Jaen

marhale ziist ke dushvār abhī ho jaa.eñ

taaki ham jiine ko tayyār abhī ho jaa.eñ

ye jo kuchh log mire chār-taraf haiñ har-vaqt

yaar ho jaa.eñ ki aġhyār abhī ho jaa.eñ

jis kī ta.abīr hai ik ḳhvāb meñ chalte rahnā

kyuuñ na us ḳhvāb se bedār abhī ho jaa.eñ

jaane phir koī zarūrat bhī rahe yā na rahe

jin ko honā hai vo ġham-ḳhvār abhī ho jaa.eñ

koī tasvīr sajā legā to koī tahrīr

kyuuñ na ham naqsh-ba-dīvār abhī ho jaa.eñ

zindagī ḳhud ko bachānā hai ki jaañ denā hai

faisle ye bhī haiñ ki vaar abhī ho jaa.eñ

ek lamhe meñ badal sakte haiñ hālāt ‘sahar’

aap agar shāmil-e-darbār abhī ho jaa.eñ

Leave a Comment