Sahar Ansari
marhale ziist ke dushvar abhi ho jaa.en
taaki ham jiine ko tayyar abhi ho jaa.en
ye jo kuchh log mire char-taraf hain har-vaqt
yaar ho jaa.en ki aghyar abhi ho jaa.en
jis ki ta.abir hai ik ḳhvab men chalte rahna
kyuun na us ḳhvab se bedar abhi ho jaa.en
jaane phir koi zarurat bhi rahe ya na rahe
jin ko hona hai vo gham-ḳhvar abhi ho jaa.en
koi tasvir saja lega to koi tahrir
kyuun na ham naqsh-ba-divar abhi ho jaa.en
zindagi ḳhud ko bachana hai ki jaan dena hai
faisle ye bhi hain ki vaar abhi ho jaa.en
ek lamhe men badal sakte hain halat ‘sahar’
aap agar shamil-e-darbar abhi ho jaa.en
Leave a Reply