hijab-e-raz faiz-e-murshid-e-kamil se uThta hai
nazar haq-ashna hoti hai parda dil se uThta hai
jala jaata huun bar-e-soz-e-gham mushkil se uThta hai
vo ashkon se nahin bujhta jo shola dil se uThta hai
kahan ḳhanjar bhi dast-e-navak-e-qatil se uThta hai
nazakat se hina ka baar bhi mushkil se uThta hai
ye kis ne Daal di bahr-e-talatum-ḳhez men kashti
ye shor-e-harche-bada-e-bad kyuun sahil se uThta hai
kashida jis se tum hote ho koi ruḳh nahin karta
girate ho nazar se tum jise mushkil se uThta hai
ye aansu kasm-pursi kis ke matam men bahati hai
janaza aaj kis ka kucha-e-qatil se uThta hai
magar tasir paida ho ga.i majnun ke nalon men
ki parda aaj dast-e-laila-e-mahmil se uThta hai
ruḳh-e-be-parda un ka yaad aata hai shab-e-hijran
hijab-e-abr jab ru-e-mah-e-kamil se uThta hai
laga di atish-e-ḳhamosh kya soz-e-mohabbat ne
ilahi ḳhair dud-e-ah-e-sozan dil se uThta hai
kiya sharminda itna saḳht-jani ne nazakat se
ḳhajalat se sar un ke samne mushkil se uThta hai
kaleja thaam len didar-e-janan dekhne vaale
bas ab parda ruḳh-e-rashk-e-mah-e-kamil se uThta hai
chale ahbab aghosh-e-lahad men chhoḌ kar mujh ko
ki hamdardi ka jazba pahli hi manzil se uThta hai
Leave a Reply