Poet
gul zaḳhm ko aansu ko guhar ham ne kaha hai
har aib-e-mohabbat ko hunar ham ne kaha hai
ra.ana.i-e-jalva ko ba-sad husn-e-tayaqqun
ḳhud apna hi ik aks-e-nazar ham ne kaha hai
kuchh baat to hai jis ke sabab saare jahan men
ai dost tujhe ḳhuld-nazar ham ne kaha hai
kahne ko rah-e-shauq men raahi to bahut the
manzil ko magar gard-e-safar ham ne kaha hai
ho jin se gham-e-tirgi-e-shab ka mudava
aise hi ujalon ko sahar ham ne kaha hai
haq-goi ka anjam samajh kar bhi ai ‘mansha’
jo kahna tha be-ḳhauf-o-ḳhatar ham ne kaha hai
Leave a Reply