chhoTi hi sahi baat ki tasir to dekho
thoḌa sa magar zahr-bujha tiir to dekho
pal bhar men bikhar ja.enge miTTi ke gharaunde
bachchon ki magar hasrat-e-tamir to dekho
kis kis ke ta.aqub men bhaTakti rahi ankhen
TuuTe hue ik ḳhvab ki ta.abir to dekho
lauT a.enge phir ghar ki taraf shaam ko panchhi
pairon se lipaTti hui zanjir to dekho
nikli jo bhanvar se to musafir the nadarat
TuuTi hui is naav ki taqdir to dekho
Leave a Reply