Be-Wafaon Ko Wafaon Ka KHuda Humne Kaha

Rajendra Nath Rahbar

be-vafaon ko vafaon ka ḳhuda ham ne kaha

kya hamen kahna tha ai dil aur kya ham ne kaha

lab ko ghuncha zulf ko kali-ghaTa ham ne kaha

dil ne ham ko jo bhi kahne ko kaha ham ne kaha

kis qadar majbur honge us ghaḌi ham ai ḳhuda

jab tire be-faiz bandon ko ḳhuda ham ne kaha

daad dena tum hamari chashm-poshi ki hamen

raah men jo gum the un ko rahnuma ham ne kaha

jab mariz-e-ishq ko koi dava aa.i na raas

dard hi ko dard ki aḳhir dava ham ne kaha

gir gaya apni nigahon men hi apna sab vaqar

jab sar-e-bazar khoTe ko khara ham ne kaha