yunhi uljhi rahne do kyuun aafat sar par laate ho
dil ki uljhan baḌhti hai jab zulfon ko suljhate ho
chhup chhup kar tum raat ko sahib ghairon ke ghar jaate ho
kaisi hai ye baat kaho to kyun-kar munh dikhlate ho
sunte ho kab baat kisi ki apni haT par rahte ho
hazrat-e-dil tum apne kiye par aḳhir ko pachhtate ho
muddat par to aa.e ho ham dekh len tum ko ji bhar ke
aa.e ho to Thahro sahib roz yahan kya aate ho
kaisa aana kaisa jaana mere ghar kya aaoge
ghairon ke ghar jaane se tum fursat kis din paate ho
ankhen jhapki jaati hain matvali ki si surat hai
jaage kis ki sohbat men jo niind ke itne maate ho
dil se ‘asar’ kya kahte ho hai jaan ka sauda ishq-e-butan
tum bhi to divane ho divane ko samjhate ho
Leave a Reply