Ku-Ba-Ku Ishq Mein Aawara-O-Ruswa Hun Main

kū-ba-kū ishq meñ āvāra-o-rusvā huuñ maiñ

ab mirā haal to ye hai ki tamāshā huuñ maiñ

ruḳhsat ai pās-e-adab al-madad ai jur.at-e-ishq

aaj āmāda-e-iz.hār-e-tamannā huuñ maiñ

koī mahfil koī aalam ho jahāñ aap nahīñ

mujh ko mahsūs ye hotā hai ki tanhā huuñ maiñ

tum ko ehsās nahīñ ik mirī ġham-ḳhvārī kā

mujh ko dekho ki sharīk-e-ġham-e-duniyā huuñ maiñ

naġhma-e-shauq jo sunñā ho to mizrāb uThā

chheḌ kar dekh ki ik sāz-e-tamannā huuñ maiñ

ek ujḌe hue ghar kā sā diyā huuñ ya.anī

jab kabhī koī jalātā hai to jaltā huuñ maiñ

Leave a Comment