vo dasht-e-tirgi hai ki koi sada na de
saaya bhi mere jism ka mujh ko pata na de
na-agahi ki raat bhi kitni latif thi
ye agahi ki dhuup hai chehra jala na de
ḳhvabon ka ik latif sa hai aks zehn par
bad-e-sumum-e-vaqt ise bhi miTa na de
chashm-e-ghazal jhiil ka manzar hasin maut
meri taraf na dekh mujhe ye saza na de
dil se bhi us nigah ka jaadu chhupa liya
nadan hai sadgi men kahin kuchh bata na de
sha.istagi ka jabr ki roya na ja saka
chup-chap dil ki aag badan ko ghula na de
ik pal ko bhi sukun na de zindagi ‘shamim’
aur bhagna bhi chahun to ye rasta na de
Leave a Reply